Ruta PR-G 238. Ruta dos Petróglifos de Teo

Partindo da Capela dos Milagres de Cornide, o percorrido desta ruta adéntrase nun espazo físico de pequenos outeiros graníticos e lenes chairas á beira do río Angureia, ocupadas por gran cantidade de restos arqueolóxicos.

Este sitio arqueolóxico representa unha das áreas de maior importancia en Galicia, e sen igual na Comarca de Compostela, pola gran densidade de xacementos de mámoas e petróglifos existentes e polas características dalgúns deses gravados.

Son moi relevantes os petróglifos de Río Angueira ou de Monte de Cornide, cun conxunto de escenas de monta, unha delas sobre un cervo; o petróglifo do Corno I, de gran importancia e recoñecemento na comunidade galega, que amosa na súa parte central un motivo cuadrangular segmentado acompañado dunha daga; e tamén os petróglifos de Pedra Bicuda de Loureiro que presentan numerosos gravados xeométricos de gran porte (combinacións circulares e espirais) e figurativos (cervos e cánidos).

Totalmente sinalizada e interpretada, con esta ruta queremos amosar un dos tesouros do noso Concello.