Ruta Á beira do Angueira

Con saída dende Cornide, na parroquia de Calo, esta ruta discorre polo trazado inicial da Ruta dos Petróglifos de Teo (PR-G 238) permitíndonos visitar os petróglifos do río Angueira e os de Outeiro do Corno sen continuar ata as estacións do Monte Piquiño.

Configúrase como unha ruta circular que, ao abandonar o camiño homologado da ruta dos petróglifos, volta ao punto de partida usando un antigo camiño medieval.

Xunto ao río atravesamos pequenas pasarelas de madeira e pasamos xunto a muíños utilizados pola veciñanza para moenda dos cereais. Podemos gozar de pequenos saltos de auga e tamén dun bosque de río en bo estado de conservación que alberga un valioso ecosistema de río.

A ruta atópase parcialmente sinalizada (no tramo que coincide coa dos petróglifos).